Adiu Lugan !

Adiu Lugan !

Es lo còr dolent qu’avèm après la marrida novèla, Lugan Bedel e sa companha Anna Mauri, dos amics nòstres, dos joves aimadors de la lenga e de la cultura occitanas se'n son anats dins un accident de veitura.

Lugan, tas cendras son tornadas en Najagués que tant aimavas. Lo païs dels Pigets. A La Piala, sias estat prestit dins la mag de las tradicions e de la lenga de Roergue. Amb ton paire Cristian-Pèire, ta maire, Anna-Maria, tos fraires, Amic e Segal, aguères l'astre de viure dins un ambient occitan. L’an passat los ancians del Grelh Roergàs te causiguèron per far lo capiscòl.

E ja, començavas de semenar, de far grelhar dins l'èime de joves roergasses, l'idèia, lo gost d'un engatjament per la lenga e la cultura d'aicí. Amb la còla de l'associacion « Dètz » que n'èras tanben lo president,as capitat amb ton fraire Amic, de far nàisser un fogal dinamic, fruchós, de creacion audiovisuala e culturala, en occitan.Quand èras membre del conselh regional dels joves, n'i a ben que se trufavan de tu e de ta volontat de salvar l'èime del país. Tu, daissavas dire, mas contunhavas... Aquelas qualitats, las te coneissiam, nautres tanben, tos amics. E sabèm la pèrda de la disparicion del polit coble que fasiatz, amb Anna, èla tanben engatjada dins lo movement per la lenga d'òc. Una pèrda immensa per l'Avairon e per l'occitanisme del sègle XXI, tant ja aviatz fach, tant prometiatz.Coma o nos diguèt, lo president de Convergéncia occitana de Tolosa, nos demòra pas qu'a seguir lo camin, sens tu, sens Anna, mas per vautres dos.

Pensam a sos parents, Cristian-Pèire e Anna-Maria, als dos fraires de Lugan : Amic l'ainat e Segal lo cabdèt. Lor disèm la nostra pena e la nòstra frairièira.

Adiu Lugan !

L’IEO del Vilafrancat
Mots clau: